ফটো-প্ৰতিদিন সংবাদ
ADRE নিযুক্তিৰ মাহেন্দ্ৰক্ষণ: ১০ জানুৱাৰীত নিযুক্তি পত্ৰ! চাহ জনগোষ্ঠীৰ ২১৫ গৰাকীক স্বাস্থ্য বিভাগত নিয়োগ মুখ্যমন্ত্ৰীৰ
গুৱাহাটী, ২৫ ডিচেম্বৰ: অসমৰ নিবনুৱা সমস্যা সমাধানৰ দিশত ৰাজ্য চৰকাৰে আৰু এক খোজ আগুৱাই নিলে। বুধবাৰে গুৱাহাটীৰ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰত এক আড়ম্বৰপূৰ্ণ অনুষ্ঠানত চাহ জনগোষ্ঠীৰ ২১৫ গৰাকী মেধাৱী যুৱক-যুৱতীক স্বাস্থ্য বিভাগত চৰকাৰী নিযুক্তি পত্ৰ বিতৰণ কৰে মুখ্যমন্ত্ৰী ডঃ হিমন্ত বিশ্ব শৰ্মাই। এই অনুষ্ঠানটো কেৱল নিযুক্তি পত্ৰ বিতৰণতে সীমাবদ্ধ নাথাকি অসমৰ লাখ লাখ ADRE পৰীক্ষাৰ্থীৰ বাবেও কঢ়িয়াই আনিলে এক উল্লাসৰ খবৰ।
ADRE পৰীক্ষাৰ্থীৰ বাবে বিগ আপডেট: জানুৱাৰীত উৎসৱমুখৰ পৰিৱেশ
নিযুক্তি পত্ৰ বিতৰণ কৰি মুখ্যমন্ত্ৰীয়ে ঘোষণা কৰে যে অসম চৰকাৰে নিযুক্তিৰ লক্ষ্য অতিক্ৰম কৰিবলৈ সাজু হৈছে। তেওঁ কয়:
- ৯ জানুৱাৰী: ADRE চতুৰ্থ বৰ্গ (Grade IV) ৰ নিযুক্তি পত্ৰ বিতৰণ।
- ১০ জানুৱাৰী: ADRE তৃতীয় বৰ্গ (Grade III) ৰ নিযুক্তি পত্ৰ বিতৰণ।
এই দুই বৃহৎ নিযুক্তিৰ পাছতেই ৰাজ্যত মুঠ চৰকাৰী নিযুক্তিৰ সংখ্যা হ’বগৈ ১ লাখ ৬০ হাজাৰ।
চাহ জনগোষ্ঠীৰ বাবে ৩% সংৰক্ষণ আৰু নতুন দিগন্ত
চাহ জনগোষ্ঠীৰ উন্নয়নৰ বাবে মুখ্যমন্ত্ৰীয়ে কেইবাটাও ঐতিহাসিক ঘোষণা কৰে। তেওঁ উল্লেখ কৰে যে আগন্তুক দিনত:
- DSP পদত নিযুক্তি: প্ৰথম আৰু দ্বিতীয় শ্ৰেণীৰ চাকৰিত ৩% সংৰক্ষণৰ ফলত এতিয়াৰে পৰা চাহ জনগোষ্ঠীৰ পৰা প্ৰতিবছৰে ৬-৭ গৰাকী যুৱক-যুৱতীয়ে DSP হোৱাৰ সুযোগ পাব।
- মেডিকেল কলেজত আসন বৃদ্ধি: ৰাজ্যৰ প্ৰতিখন মেডিকেল কলেজত চাহ জনগোষ্ঠীৰ বাবে ৪ টাকৈ পদ সংৰক্ষিত হ’ব, যাৰ ফলত মুঠ ১৪ টা আসন বৃদ্ধি পাব।
- ভূমিৰ অধিকাৰ: চাহ বাগিচাৰ শ্ৰমিকসকলে এতিয়াৰে পৰা নিজৰ মাটিৰ পট্টা লাভ কৰিব, যাৰ জৰিয়তে তেওঁলোকে বেংকৰ পৰা ঋণ লৈ ব্যৱসায়-বাণিজ্য কৰিব পাৰিব।
- নতুন হাইস্কুল: জানুৱাৰী মাহতে চাহ বাগিচা অঞ্চলত নতুন হাইস্কুল মুকলি কৰা হ’ব।
"বাগিচাৰ শ্ৰমিক এতিয়া কেৱল শ্ৰমিক হৈ নাথাকে, তেওঁলোক মাটিৰ মালিকো হ’ব। ১০ বছৰ যদি এই পৰিৱৰ্তনৰ ধাৰা অক্ষুণ্ণ থাকে, তেন্তে চাহ জনগোষ্ঠী আন উন্নত জনগোষ্ঠীৰ সমান্তৰাল হ’ব।" - ডঃ হিমন্ত বিশ্ব শৰ্মা
নৱ-নিযুক্তসকললৈ মুখ্যমন্ত্ৰীৰ আৱেগিক পৰামৰ্শ
চাকৰি পোৱা নৱ-প্ৰজন্মক উদ্দেশ্যি মুখ্যমন্ত্ৰীয়ে দুটা গুৰুত্বপূৰ্ণ কথা কয় - প্ৰথমটো হ’ল পিতৃ-মাতৃৰ প্ৰতি দায়িত্ব আৰু দ্বিতীয়টো হ’ল মানৱীয় সেৱা। চিকিৎসালয়লৈ অহা দৰিদ্ৰ ৰোগীৰ পৰা যাতে কোনেও এদৰমহাও উৎকোচ নলয় আৰু তেওঁলোকক নিজৰ আত্মীয়ৰ দৰে ব্যৱহাৰ কৰে, তাৰ বাবে তেওঁ কঠোৰ নিৰ্দেশ দিয়ে।
Post a Comment