মাঘ বিহুৰ উৰুকা
ভোগ-ৰসৰ সম্ভাৰে উৰুকা: মাঘ বিহুত অসমৰ বজাৰত মাছ-মাংসৰ উজান, গাঁও-চহৰ জুৰি উৎসৱমুখৰ পৰিৱেশ
থুৰতে: ভোগালী বিহুৰ উৰুকাত অসমৰ চহৰ আৰু গ্ৰামাঞ্চল জুৰি এসাঁজ একেলগে খোৱাৰ আনন্দ। বজাৰত বৃহদাকাৰ মাছৰ উজান, গাঁওসমূহত ভেলাঘৰ আৰু সমূহীয়া ভোজে উজ্বল কৰিলে অসমীয়া সংস্কৃতি।
ভোগালী বিহুৰ উৰুকা: আনন্দ, ঐতিহ্য আৰু সম্প্ৰীতিৰ উৎসৱ
ভোগ-ৰসৰ সম্ভাৰ লৈ হেঁপাহৰ ভোগালী বিহু পুনৰ এবাৰ অসমীয়াৰ দুৱাৰেদুৱাৰে উপস্থিত। আজি মাঘ বিহুৰ উৰুকা - এই উৰুকাই অসমীয়া সমাজত আনন্দ, ঐক্য আৰু ঐতিহ্যৰ এক বিশেষ প্ৰতীক হিচাপে স্থান পাই আহিছে। উৰুকা মানেই লগে-ভাগে এসাঁজ খোৱা, হাঁহি-মজা, পৰিয়াল আৰু সমাজক একেলগে বান্ধি ৰখাৰ এক অনন্য পৰম্পৰা।
শদিয়াৰ পৰা ধুবুৰীলৈ আজি সমগ্ৰ অসম জুৰি অনুভৱ কৰা গৈছে উৰুকাৰ উৎসৱমুখৰ পৰিৱেশ। ঘৰে ঘৰে আৰম্ভ হৈছে ব্যস্ত প্ৰস্তুতি। ৰন্ধনঘৰত হাঁহ-মাংস, গাহৰি, মাছ আৰু পিঠা-পনা তৈয়াৰ কৰাৰ ব্যস্ততা। বজাৰে বজাৰে দেখা গৈছে গ্ৰাহকৰ উপচি পৰা ভিৰ।
বজাৰত বৃহদাকাৰ মাছৰ উজান
ভোগালীৰ উৰুকাক কেন্দ্ৰ কৰি মাছৰ বজাৰসমূহত সৃষ্টি হৈছে বিশেষ চাঞ্চল্য। থলুৱা মাছৰ লগতে বৃহদাকাৰৰ ৰৌ, ভকুৱা, বৰালী, চিতল, আৰি আদি মাছেৰে ভৰি উঠিছে বজাৰ। বজাৰে বজাৰে খলখলাই আছে ডাঙৰ ডাঙৰ মাছে।
পছন্দৰ মাছটো ক্ৰয় কৰিবলৈ বহু লোকে পুৱতি নিশাৰ পৰাই বজাৰত উপস্থিত হৈছে। বিশেষকৈ ডাঙৰ মাছ কিনিবলৈ আগতীয়াকৈ বজাৰলৈ ওলাইছে একাংশ গ্ৰাহক। উৰুকাৰ নিশা পৰিয়াল আৰু আত্মীয়-স্বজনৰ সৈতে একেলগে উপভোগ কৰিবলৈ এই মাছসমূহ ক্ৰয় কৰিছে বহু পৰিয়ালে।
চহৰৰ লগতে গ্ৰামাঞ্চলতো উৰুকাৰ উলহ
কেৱল চহৰতেই নহয়, গ্ৰামাঞ্চলৰ বজাৰসমূহতো আজি দেখা গৈছে ডাঙৰ মাছৰ সমাহাৰ। গাঁওসমূহত উৰুকাৰ নিশাক কেন্দ্ৰ কৰি সুকীয়া উলহ-মালহ। ঠাই বিশেষে আয়োজন কৰা হৈছে সমূহীয়া ভোজ-ভাতৰ।
পথাৰত নিৰ্মাণ কৰা ভেলাঘৰসমূহতো গাঁওবাসীয়ে একেলগে ভোজভাত খাবলৈ সাজু হৈছে। ঢোল-পেঁপাৰ মাত, হাঁহি-উল্লাস আৰু এসাঁজ একেলগে খোৱাৰ আনন্দই গ্ৰামাঞ্চলত সৃষ্টি কৰিছে ভোগালীৰ সুকীয়া মাদকতা।
ঐতিহ্য, সম্প্ৰীতি আৰু সমাজিক বন্ধনৰ উৎসৱ
ভোগালীৰ উৰুকা কেৱল খাদ্যৰ উৎসৱ নহয়, ই অসমীয়া সমাজৰ ঐতিহ্য, সম্প্ৰীতি আৰু সমাজিক একতাৰ প্ৰতীক। এই নিশাই মানুহক ব্যস্ত জীৱনৰ পৰা অলপ সময় উলিয়াই একেলগে থকাৰ সুযোগ দিয়ে।
ভেলাঘৰ, সমূহীয়া ভোজ, পৰিয়ালৰ সৈতে এসাঁজ - এই সকলো মিলি ভোগালী বিহুক কেৱল এটা উৎসৱ নহয়, বৰঞ্চ অসমীয়া পৰিচয়ৰ এক জীৱন্ত প্ৰতিচ্ছবি হিচাপে প্ৰতিষ্ঠা কৰিছে।
ভোগালী বিহু উৰুকা ২০২৬,মাঘ বিহু উদযাপন অসম,অসম মাছ বজাৰ উৰুকা নিশা
Post a Comment