মধ্যপ্ৰাচ্য সংঘাতৰ প্ৰভাৱ: প্ৰধানমন্ত্ৰী নৰেন্দ্ৰ মোদীৰ নেতৃত্বত জৰুৰী CCS বৈঠক, ভাৰতৰ বাবে বহুমুখী ৰণনীতি

ফটো ক্ৰেডিট-নিউজ'নিয়াৰ

IT Rules 2025: চৰকাৰৰ ডাঙৰ পদক্ষেপ! ফেচবুক, টুইটাৰৰ পৰা 'পোষ্ট' আঁতৰোৱাৰ নিয়ম সলনি হ'ল। এতিয়া কেৱল জ্যেষ্ঠ বিষয়াইহে দিব পাৰিব নিৰ্দেশ

সাৰাংশ: IT Rules 2025: এতিয়াৰে পৰা সৰু-সুৰা বিষয়াই ছ'চিয়েল মিডিয়াৰ 'পোষ্ট' ডিলিট কৰিব নোৱাৰিব! কেন্দ্ৰীয় চৰকাৰে জাৰি কৰিলে নতুন, কঠোৰ নিয়ম। ১৫ নৱেম্বৰৰ পৰা কাৰ্যকৰী হ'বলগীয়া এই নিয়ম অনুসৰি, কেৱল জ্যেষ্ঠ বিষয়াইহে (যুটীয়া সচিব বা উপ-আৰক্ষী মহাপৰিদৰ্শক পৰ্যায়ৰ) স্পষ্ট কাৰণ দৰ্শাই কন্টেন্ট আঁতৰোৱাৰ নিৰ্দেশ দিব পাৰিব।


নতুন দিল্লী: কেন্দ্ৰীয় ইলেক্ট্ৰনিক্স আৰু তথ্য প্ৰযুক্তি মন্ত্ৰালয়ে (MeitY) ভাৰতৰ ডিজিটেল জগতখনক লৈ এক গুৰুত্বপূৰ্ণ ঘোষণা কৰিছে। মন্ত্ৰালয়ে 'তথ্য প্ৰযুক্তি (মধ্যস্থতাকাৰী নিৰ্দেশনা আৰু ডিজিটেল মিডিয়া এথিক্স কোড) সংশোধনী নিয়ম, ২০২৫' অধিসূচিত কৰিছে, যিয়ে ২০২১ চনৰ মূল IT নিয়মসমূহক সংশোধন কৰিব।

এই নতুন নিয়ম অহা ১৫ নৱেম্বৰ, ২০২৫ তাৰিখৰ পৰা সমগ্ৰ দেশতে কাৰ্যকৰী হ'ব।

এই সংশোধনীৰ নিশ্বিত প্ৰভাৱ আপোনাৰ-মোৰ দৰে সাধাৰণ ছ'চিয়েল মিডিয়া ব্যৱহাৰকাৰীৰ ওপৰত পৰিব। ইয়াৰ মূল লক্ষ্য হৈছে ফেচবুক, এক্স (X, পূৰ্বতে টুইটাৰ), ইনষ্টাগ্ৰাম আদি প্লেটফৰ্মৰ পৰা 'অবৈধ কন্টেন্ট' আঁতৰোৱাৰ প্ৰক্ৰিয়াটো অধিক স্বচ্ছ, যুক্তিসংগত আৰু দায়বদ্ধ কৰি তোলা।

পটভূমি: কিয় এই পৰিৱৰ্তনৰ প্ৰয়োজন হ'ল?

২০২১ চনত চৰকাৰে মূল IT নিয়মখন জাৰি কৰিছিল। সেই নিয়মৰ Rule 3(1)(d) অনুসৰি, আদালতে বা চৰকাৰে 'প্ৰকৃত জ্ঞান' বা অৱগত কৰা 'নটিফিকেচন' পালেই মধ্যস্থতাকাৰীসকলে অবৈধ কন্টেন্ট আঁতৰাব লাগিছিল।

কিন্তু, MeitY-ৰ পৰ্যালোচনাত দেখা গ'ল যে এই 'অৱগত কৰা' প্ৰক্ৰিয়াটো বহু সময়ত অস্পষ্ট আছিল। ইয়াৰ অপব্যৱহাৰ ৰোধ কৰিবলৈ, জ্যেষ্ঠ পৰ্যায়ত জবাবদিহিতা নিশ্চিত কৰিবলৈ, কন্টেন্টৰ সঠিক বিৱৰণ দিবলৈ আৰু চৰকাৰী নিৰ্দেশসমূহৰ উচ্চ পৰ্যায়ত পৰ্যায়ক্ৰমিক পৰ্যালোচনাৰ প্ৰয়োজন আছিল। সেয়ে এই নতুন সংশোধনী অনা হৈছে।

নতুন নিয়মৰ মূল আকৰ্ষণ কি?

এই নতুন নিয়মে কন্টেন্ট(লিখনি,ফটো বা ভিডিঅ') আঁতৰোৱাৰ সমগ্ৰ প্ৰক্ৰিয়াটোক সলনি কৰি পেলাব। ইয়াৰ তিনিটা মুখ্য বৈশিষ্ট্য আছে:

১. কেৱল জ্যেষ্ঠ বিষয়াইহে নিৰ্দেশ দিব পাৰিব

এতিয়াৰে পৰা যিকোনো চৰকাৰী বিষয়াই ছ'চিয়েল মিডিয়া কোম্পানীক 'পোষ্ট ডিলিট' কৰিবলৈ ক'ব নোৱাৰিব।

• চৰকাৰী বিভাগ: এই নিৰ্দেশ কেৱল ভাৰত চৰকাৰৰ যুটীয়া সচিব বা সমপৰ্যায়ৰ জ্যেষ্ঠ বিষয়াইহে জাৰি কৰিব পাৰিব।

• আৰক্ষী: আৰক্ষী বিভাগৰ ক্ষেত্ৰত, কেৱল বিশেষভাৱে কৰ্তৃত্বপ্ৰাপ্ত উপ-আৰক্ষী মহাপৰিদৰ্শক পৰ্যায়ৰ বিষয়াইহে এনে নিৰ্দেশ দিব পাৰিব।

২. স্পষ্ট কাৰণ দৰ্শোৱা জাননী

কেৱল নিৰ্দেশ দিলেই নহ'ব, কিয় কন্টেন্টটো আঁতৰোৱা হৈছে তাৰ স্পষ্ট 'যুক্তিযুক্ত কাৰণ' থকা জাননী দিব লাগিব।

• জাননীত আইনী ভিত্তি আৰু কোনটো আইনৰ কোনটো ধাৰা উলংঘা হৈছে, সেয়া স্পষ্টকৈ লিখা থাকিব লাগিব।

• কন্টেন্টটোৱে কি ধৰণৰ অবৈধ কাম কৰিছে,যেনে - হিংসা বিয়পোৱা, ভুৱা খবৰ, সাম্প্ৰদায়িক মন্তব্য তাৰ বিৱৰণ থাকিব লাগিব।

• আঁতৰাবলগীয়া কন্টেন্টটোৰ নির্দিষ্ট লিংক উল্লেখ কৰাটো বাধ্যতামূলক। ইয়াৰ ফলত অস্পষ্টতা দূৰ হ'ব।

৩. মাহেকীয়া পৰ্যালোচনা হ'ব

এই ব্যৱস্থাটো যাতে স্বেচ্ছাচাৰী হৈ নপৰে, তাৰ বাবে এক শক্তিশালী পৰ্যালোচনা ব্যৱস্থা ৰখা হৈছে।

• জ্যেষ্ঠ বিষয়াসকলে দিয়া এনে সকলো কন্টেন্ট আঁতৰোৱাৰ নিৰ্দেশনা প্ৰতি মাহে চৰকাৰৰ সচিব পৰ্যায়ৰ এজন উচ্চ বিষয়াই পুনৰীক্ষণ কৰিব।

• এই পৰ্যালোচনাই নিশ্চিত কৰিব যে লোৱা ব্যৱস্থাবোৰ প্ৰয়োজনীয়, আইনসন্মত আৰু যুক্তিসংগত হৈ থাকে।

অধিকাৰ আৰু দায়িত্বৰ মাজত ভাৰসাম্য

চৰকাৰে স্পষ্ট কৰিছে যে এই সংশোধনীয়ে নাগৰিকৰ সাংবিধানিক অধিকাৰ (যেনে - বাক স্বাধীনতা) আৰু ৰাজ্যৰ সুৰক্ষাৰ বাবে থকা আইনী ক্ষমতাৰ মাজত এক সুন্দৰ সন্তুলন ৰক্ষা কৰিব। ইয়াৰ উদ্দেশ্য হৈছে স্বচ্ছতা বজাই ৰাখি অনলাইন জগতখনক সুৰক্ষিত কৰা, যাতে কোনো ধৰণৰ স্বেচ্ছাচাৰী সিদ্ধান্ত গ্ৰহণ কৰিব পৰা নাযায়।

ইয়াৰ প্ৰভাৱ কি হ'ব?

• স্বচ্ছতা আৰু জবাবদিহিতা: কন্টেন্ট মডাৰেচন প্ৰক্ৰিয়াত অভূতপূৰ্ব স্বচ্ছতা আৰু জবাবদিহিতা বৃদ্ধি পাব।

• মধ্যস্থতাকাৰীৰ বাবে স্পষ্টতা: ফেচবুক, গুগল, এক্স (X) আদি কোম্পানীবোৰে আইন মানি চলিবলৈ স্পষ্ট নিৰ্দেশনা লাভ কৰিব।

• নাগৰিকৰ অধিকাৰ সুৰক্ষা: আটাইতকৈ গুৰুত্বপূৰ্ণ কথাটো হ'ল, ইয়াৰ দ্বাৰা সাধাৰণ ব্যৱহাৰকাৰীৰ অধিকাৰ সুৰক্ষিত হ'ব আৰু কন্টেন্ট আঁতৰোৱাৰ নামত হোৱা স্বেচ্ছাচাৰীতা বন্ধ হ'ব।